दीक्षाभूमीचा विकास आराखडा लवकरच सर्वसहमतीतून साकारू - पालकमंत्री चंद्रशेखर बावनकुळे

भारतरत्न डॉ. बाबासाहेब आंबेडकर यांच्या अनुयायांचे शक्तीस्थळ म्हणून ओळखल्या जाणा-या दीक्षाभूमी विकासाचा आराखडा लवकरच सर्वसहमतीतून साकारू !

National Media News 06/07/2026 National

नागपूर, दि. 6 जुलैे 2026:– महानगराचा वाढलेला विस्तार आकारास येऊ घातलेले नवीन नागपूर, येथील औद्योगिक क्षेत्रासह पर्यटन क्षेत्रामध्ये झालेली वृद्धी लक्षात घेत देश विदेशातील भारतरत्न डॉ. बाबासाहेब आंबेडकर यांच्या अनुयायांचे शक्तीस्थळ म्हणून ओळखल्या जाणा-या दीक्षाभूमी विकासाचा आराखडा लवकरच सर्वसहमतीतून साकारू असे सूतोवाच महसूल मंत्री तथा पालकमंत्री चंद्रशेखर बावनकुळे यांनी आज येथे केले. नागपूर सुधार प्रन्यास येथे आयोजित बैठकीत त्यांनी श्री. महालक्ष्मी जगदंबा संस्थान तीर्थस्थळाचा विकास आणि विविध विकास प्रकल्पांचा आढावा घेतला. या बैठकीस नागपूर सुधार प्रन्यासचे सभापती संजय मीणा, महाव्यवस्थापक सचिन ढोले व वरिष्ठ अधिकारी उपस्थित होते. भारतरत्न डॉ. बाबासाहेब आंबेडकर यांनी दीक्षाभूमीबाबत जी आस्था व दूरदृष्टी ठेवली त्याचे प्रतिबिंब दीक्षाभूमी परिसरात चांगल्या पद्धतीने कसे उमटेल याची आपण काळजी घेत आहोत. लाखो अनुयायी येथून प्रेरणा घेऊन जातात. शिका, संघटित व्हा आणि संघर्ष करा ही त्यांनी दिलेली प्रेरणा प्रत्येकापर्यंत पोहोचविण्यासाठी आपण प्रयत्नशील आहोत. पंचशील तत्वाचे पालन आणि धम्माचे तत्व हे दीक्षाभूमी परिसरात अधिकाधिक चांगल्या पद्धतीने प्रतिबिंबित झाले पाहिजे असे महसूल मंत्री तथा पालकमंत्री चंद्रशेखर बावनकुळे यांनी सांगितले. दीक्षाभूमी परिसराचा विकास हा लोकप्रतिनिधी, समाजातील चिंतक यांच्या सहयोगातूनच आपण साकारण्यासाठी प्राधान्य दिले आहे. लवकरच याबाबत एक विशेष बैठक बोलावून त्याबाबत सविस्तर माहिती व प्रकल्पाचा आराखडा पूर्णत्वास नेऊ असे त्यांनी स्पष्ट केले, नवीन नागपुरातील ले आऊट टाकण्याअगोदर पाणीपुरवठा व मलनिसारण याला प्राधान्य द्या नवीन नागपूर साकारण्यासमवेत नागपूरच्या बाह्यवळण रस्त्याचे दोन टप्पे करण्यात आले आहेत. एका बाजुला रस्त्यांची उत्तम सुविधा पूर्ण होत असताना नगरातील सुविधेच्या दृष्टीने पाणीपुरवठा, मलनिसारण, गटरलाईन, नाल्यांची संरचना याही बाबी तेवढ्याच महत्वाच्या आहेत. भविष्यातील गरजांची पडताळणी करून या सुविधा अधिकाधिक परिपूर्ण कशा होऊ शकतील यावर भर देण्याचे निर्देश पालकमंत्री चंद्रशेखर बावनकुळे यांनी दिले. नागपूर सुधार प्रन्यास व नागपूर महानगर प्रदेश विकास प्राधिकरण यांच्या अधिपत्याखाली असणा-या सर्व जागांची ड्रोनद्वारे आणि एमआरसॅक यंत्रणेचा वापर करून मॅपिंग करण्याचे निर्देशही त्यांनी दिले. या बैठकीनंतर जिल्हाधिकारी कार्यालयात त्यांनी बैठक घेऊन अतिवृष्टी झाल्यास नागरिकांची तारांबळ होऊ नये यादृष्टीने प्रशासकीय उपाययोजनांचा आढावा घेतला. पट्टेवाटप आपात्कालीन व्यवस्थापनासाठी निधीची उपलब्धता, पाणंद रस्ते, ग्रामीण भागातील रस्त्यांची नोंदणी, जी राम जी अंतर्गत वृक्ष लागवड, झुडपी जंगल अतिक्रमण, वनराई बंधा-याचे पुनर्जीवन याबाबत सविस्तर आढावा घेतला. जिल्हाधिकारी कुमार आशीर्वाद व वरिष्ठ अधिकारी या बैठकीस उपस्थित होते .